Atur Piuning Prawartaka Karya

 I Nyoman Suka Ardiyasa

Om Swastyastu

·     Sane kusumayang titiang, Rektor IHDN Denpasar, sane rikanjekan mangkin keangganin olih Pembantu Rektror I IHDN Denpasar

·        Sane wangiang titiang wakil rektor I, II lan III IHDN Denpasar

·        Sane wangiang titiang, Biro Umum lan Biro Akademik IHDN Denpasar

·        Sane wangiang titiang, Dekan Fakultas Dharma Acarya miwah jajaran ipun

·   Sane wangiang titiang, Ketua Jurusan Pendidikan Agama Hindu lan Ketua Jurusan Pendidikan Bahasa dan Sastra Agama Fakultas Dharma Acarya IHDN Denpasar

·     Sane wangiang titiang, Dosen-dosen Jurusan Pendidikan Bahasa dan Sastra Agama

·        Sane wangiang titiang, Para Narawakia

·        Sane wangiang titiang Aliansi Peduli Bahasa Bali

·        Sane wangiang titiang Ketua DPM, BEM, BPM Fakultas, BEM Fakultas HMJ miwah sameton sane sampun presida rauh ring acarane puniki.

·        Lan para Pemilet Pasimakrama Jurusan Pendidikan Bahasa dan Sastra Agama sane tresna sihin titiang.

        Angayu bagia pisan manah titiang ring rahina mangkin riantukan iraga sareng sami sampun prasida mapupul iriki ring acara pasimakraman jurusan pendidikan Basa Bali sane kalaksanayang rahinane mangkin rahina Saniscara wage, pinanggal 10 Mei 2014 (kalih tali pat belas).  Titiang pinaka manggalaning karya pasimakraman rahinane mangkin ngaturang suksmaning manah antuk uratian Ida dane sareng sami utaminyane kulawarga ring Jurusan Basa Bali IHDN Denpasar. Sane pinaka wiwilan acara rahinane mangkin nenten lian wantah mapaiketan sareng wanti warsa utawi HUT FDA miwah mangda prasida ngwangun komunikasi sane becik ri pantaraning jurusan Pendiidkan Basa Bali sane kacihnayang antuk nglaksanayang seminar sane ngambil tema "Nglimbakang sakancan Inovasi Kreatif ring Basa Bali." Ri sampune seminar puniki puput jagi kalanturang antuk nglaksanayang pabligbagan utawi diskusi sane matetujon ngwedar pikobet-pikobet sane mapaiketan sareng basa Bali, minab ida dane sampun uning kahanan basa Baline sane mangkin kabaos carut marut utawi sayan rered santukan kawentenan panglimbak kurikulum 2013. Taler Prasida aturang titiang ring Ida dane sareng sami, HMJ FDA miwah Aliansi Peduli Basa Bali sampun polih masadu ajeng sareng Gubenur Bali ring rahina Saniscara sane sampun lintang, mligbagang pikobet-pikobet indik basa Bali utaminyane sane mapaiketan sareng penyuluh basa Bali ring sajeroning desa Pakraman. Sane ngwetuang pikolih Gubenur Bali masemaya jagi nglaksanayang utawi merealisasikan semayane punika ring warsa 2015.

Ida Dane sareng sami sane wangiang titiang, acara rahinane mangkin mikolihang dana saking mahasiswa jurusan bahasa Bali. Yening indik peserta ring acarane puniki inggih punika kulawarga saking Fakultas Pendidikan Bahasa Bali saking Denpasar Bangli miwah singaraja.

        Ida Dane sareng sami sane wangiang titiang ten lali titiang ngaturang suksmaning idep majeng ring Bapak Rektor IHDN Denpasar, Bapak dekan miwah para manggala kampus sane sampun ngicenin pamargi nyantos karya puniki presida puput, kenten taler majeng ring Aliansi Peduli Bahasa Bali sane setata nyarengin pamargi ngewangun karya puniki, saking gases taler sane sampun ngicenin ilen-elen (property) ten lali titiang taler ngucapang suksma. 

        wantah kadi asapunika sane prasida aturang titiang ring galahe sane becik puniki. Yening wenten iwang atur titiang sane nenten menggah ring kayun titiang nglungsur geng rena pangampura, duaning punika sami metu saking kawimudan padewekan titiang. Puputang titiang antuk paramasanti,

Om Shanti, Shanti, Shanti Om.