Agama

Reringkesan Wiracarita Rāmāyana ( Sapta Kandā)

            Cerita Rāmāyana inggih punika carita indik kawentenan sang Rāma pinaka panumadian sang Hyang wisnu rauh kamercepada jagi nyiatin Adharma sane kekaryanin olih Sang Rahwana. Wit carita Rāmāyana punika mebasa Sansekerta sane kekawi olih Rsi Wālmīki, punika saking wastan alas ring pantaraning tukad Kusa miwah Lawa. Ring Bali cerita punika wantah kedadosang biseka Gītā Rāmāyana.

            Rāmāyana punika kepalih dados 7 (pitung) paos, mawasta Sapta Kānda inggih punika

1.      Bala Kānda :

Kānda sane pangawit puniki nyritayang sang Prabhu Dasaratha nyeneng ratu ring  panegara Kosalia, kuta rajane mawasta Ayodhyā, Ida Sang Prabhu madrewe prameswari tetiga, minakadin nyane: Dewi Kekayi, Dewi Sumitra lan Dewi Kausalya.

Dewi Kausalya maputra Sang Rāmadewa, Dewi Kekayi ngaputrayang Sang Bharata, miwah Dewi Sumitra maputra kembar lanang-lanang inggih punika Sang Laksmana lan Sang Satrugna. Sesampune Sang Rama miwah para arindane duur, nuli kauruk olih Ida Bhagawan Wasistha, tur sami rajaputra punika wikan wiadin pascat ring sapauruk Ida Sang Pandita Guru.

Sang Rāma lan Sang Laksmana kaloktah ring jagate pascat ring aji pepanahan, turmaning susila-sulaksana. Punika mawinan sang rajaputra kalih inucap kapinang (kalamar) olih Bhagawan Wiswamitra, sang maraga tapaswi mapasraman ring gunung alas, mangda sang rajaputra kalih kayun dados prakantin Ida para tapaswine ring pasraman, pacang nulakang saananing baya miwah panyengkalene, rikanjekan Ida para tapaswine mayoga. Panyengkalan punika wantah saking raksasa wadwan sang Rahwana, agunge ring Lengkapura.

Ida Sang Rama miwah Sang Laksmana, mresidayang ngaonang raksasa-raksasa ne sane nguragada wiadin ngusak-asik Sang tapaswi, minakadin nyane : Sang Marica ketes kasabatang antuk panah angin linus, seos punika Si Raksasi Tataka padem pegat baongipune.

Sang Rama lan Sang Laksmana lunga ka negara Metila, ngamiletin swayambara (sewamara), tur mapamuput ngeniang Dewi Sītā maka pikolih. Dewi Slta punika putran Sang Prabhu Janaka, sang jumeneng natha ring Metila. ............................................

2.      Ayodhya Kanda

Nyritayang Sang Prabhu Dasaratha nyerahang keprabon ring Sang Rama, kewanten kapialangin olih Dewi Kekayi. Dewi Kekayi eling ring pasobayan Ida ring Sang Prabhu duke rihin, sadaweg Ida kareremih pacang kaalap rabi. Duaning Sang Prabhu gumanti satia wecana, sapunika taler Ida Sang Rama dahat subakti ring aji, awinan susrusa kayun Ida ngawangdeang pacang nampenin kaprabhone, saha lunga masusupan ka alase masue 14 warsa.

Ida Sang Rama kaiiring olih rabi lan arin ida masusupan ring tengahing alas-gununge. Wiakti purusa sura-dira sang tiga nepetin wacana miwah ngamargiang swadharman sang meraga rabi lan rumaga ari.

Sang Dasaratha kasuen-suen seda, antuk banget nandang panyungkan minakadi kayun Ida lintang sungsut. Sang Bharata ngruruh rakane Sang Rama, mangda kayun mantuk ka puri saha nyeneng natha. Sang Bharata nguningayang indik kawen-tenanne ring puri Ayodhya, yaning  I aji sampun ndewata. Punika mawinan Sang Bharata kedeh mapinunas ring rakane, mangda kayun ugi mantuk ka Ayodhya ngantinin Ida I aji sang maraga rajadewata (almarhum), pacang nglinggihin singasana kaagungane. Sakewanten sang Rama nenten nglinggihin pinunas arine, tur maridartayang, wantah Ida ngamanggehang satia-wacana, mangda nenten kabaos alpaka guru rupaka.

Malarapan antuk ledang kadulurin welas asih kayun ida Sang Rama, raris Ida mapaica pitutur ring arine indik Pamrintahan (rajaniti), sane kaloktah mawasta : Nitisastra.

Pemuput kadurus sang Bharata ngiringang baos Ida iraka, jumeneng agung ring negara Ayodhya.

3.      Aranya Kanda :

Nyritayang Ida Sang Rama lan Sang Laksmana dados prakantin watek tapaswine, mangda tan kausak-asik antuk para raksasane. Sang Rama kagoda olih raksasi Surpanaka. Kapademan i pun I raksasa Trisirah, Kara lan raksasa Dusana somah ipun iraksasi Surpanaka. Sang Marica masalin rupa dados kidang mas, pacang mancanen Sang Rama, titah Ida Sang Rahwana, mangda dangan mamandung Dewi Slta, mapamuput kapademan ipun I raksasa Marica. Dewi Sītā kapandung antuk Ida Prabhu Rahwana, nglantur payudan dane Sang Jatayu ring Ida Sang Rahwana.

4.      Kiskindha Kanda

Patulung Ida Sang Rama lan Laksmana ring Kapiraja Sugriwa, nyedayang dane Sang Kapiraja Subali. Wiwilannyane punika, saantukan Sang Bali mayuda ring Sang Sugriwa (raka-rai) marebutin Dewi Tara. Sang Wenara Anggada kaadegang Juwareja (rajaputra / putra mahkota) olih dane Sugriwa. Bala wenarane ngruruh Dewi Sītā ka Lengkapura, sampun rauh ring pasisi.

5.      Sundara Kanda :

Nyritayang Sang Anuman makecog rauh ring Lengkapura, tur maslaksakan ngruruh Dewi Sītā. Sesampune Dewi Slta kapanggih tur sampun dane nguningayang kawentenan Ida Sang Rama ring Gunung Resyamuka, raris dane ngaturang ali-ali paican Ida Sang Rama maka cihna, raris Ida Dewi Sītā mapaica surat majeng ring Ida Sang Ramadewa.

Wus punika dane Sang Anuman mapamit, tur nyujur tetamanan Puri Lengkane, makadi taru parijata sami kabelbalang. Sang Anuman kaejuk saha kategul, katunjelin. Sakewanten tali panegulan danene telas tastas, tur wewangunane ring Puri Lengka katah sami puun, keni lahlahan geni sane kaanggen nunjel dane Sang Marutsuta (Sang Anuman).

Sesampune kapikayun antuk dane pamargin dane mapikolih, raris dane mawali tangkil ring Ida Sang Rama ring Gunung Resyamuka, tumuli ngaturang surat pakirim Dewi Slta.

6.      Yuddha Kanda :

Nyritayang bala wenarane makarya Situbanda (jembatan). Sang Ramadewa kairing olih bala wenarane sami ngamendenang peparuman. Sesampune puput pawilangan nyane raris kakawitin yudane, inggih punika payudan Ida Sang Rama ring Sang Rahwana. Sang Rahwana seda malarapan antuk purusa ring tengahing payudan.

Maka pangentos Ida jumeneng natha ring panegara lengka, kabiseka Ida Sang Punta Wibhlsana, kaloktah maparab Sang Gunawan.

Ida Sang Dewi Sītā malabuh Geni, nyihnayang kasucian kayun kalih angganida, kemawon Ida tan seda. Sesampun nyane asapunika raris Sang Rama, Dewi Slta lan Sang Laksmana mantuk ka Puri Ayodhya, kairingang olih Wibhlsana, Sang Sugriwa, makamiwah Sang Anuman. Sarauh Ida Sang Rama ring Puri Ayodhya, kala irika Ida Sang Bharata raris nyerahang kaagungane ring rakane Sang Ramadewa.

7.  Uttara Kanda

Irika nyritayang Dewi Sītā kakutang ring alas, tampek ring pasraman Ida Bhagawán Bálmlki (Walmiki), tur jumenek irika kaanggen putra olih Ida Bhagawán Bálmlki.

Kala irika Ida Bhagawán Bálmlki raris ngiket (ngawi) kekawian, sane nyritayang indik pamargin Ida Sang Rámadewa, sane kaloktah mawasta : RAMĀYĀNA. Rāma = Sang Rāma, āyana = pamargi. Tegesipun Rāmāyana = pamargin Ida Sang Rāma.

Kala punika Dewi Sītā madrewe putra kembar lanang-lanang kakalih, maparab Sang Kusa miwah Sang Lawa. Anake alit kalih punika kaupapira saha kaupaayu olih Bhagawán Bálmlki, kauruk indik ulahing Sang Ksatria.

Sang Rámadewa ngawentenang Karya Agung “RAJASUYA” inggih punika karya pabisekan ida madeg agung maka raja di raja (maharaja). Duaning asapunika Ida Sang Ramadewa sampun nglimbakang pinangan (undangan) majeng ring para Bupati, para Rai, para Sujana-Sujana kalih ring para pretakjana sami.

Tan lempas Ida Bhagawán Bálmlki karauhan pinangan Ida Sang Ráma. Riantukan asapunika, Ida Bhagawán mapikarsa pacang ngrauhin paminang Ida Sang Ráma, kairing olih Sang Kusa lan Sang Lawa.

Ida Sang Kusa miwah Sang Lawa ngwacen daging kekawian Ida Bhagawan Walmlki sane mawasta : RAMĀYĀNA, kandugi kagegaok Sang Rāma mirengang kalengutan daging kekawian punika, inggihan kapascatan sang kalih ngwacen wiadin negesin daging kekawian inucap. Sumayan banget kagiatidane, saantukan ring daging kekawian punika, kaembadang daging pamargin saha panyenenganida. Punika mawinan Ida Sang Rāma  ngelingin saha nunas ring Sang Bhagawan mangda anake alit punika kalugra nagingin pikarsan Ida Sang Rāma . Saantukan Sang Kusa lan Sang Lawa wantah putran Ida Sang Rāma, maprabine ring Dewi Sītā.

Dewi Sitä kandikayang mangda kayun mawali jumeneng prameswari, kemawon Ida Dewi Sītā nenten ngiringang, tur ngranjing ring pangkon Hyang Pertiwi. Sang Rāma  micayang kaprabonida ring putrane makakalih, tur Ida mantuk ka Wisnuloka.

Inggih kadi asapunika samatra kaparidartayang daging Rämäyanane, sane pecak kaawi olih Ida Bhagawän Bälmiki.