SATUA I EMPAS LAN I ASU

I EMPAS PADEM KABATEK

ANTUK GEDEG IPUN RING ASU

Katerjemahang Olih

I Nyoman Suka Ardiyasa

Karyasiswa Pascsarjana Pendidikan Bahasa Bali IHDN Denpasar

Kacrita wenten reke empas kekalih lua muani. Ane muani mawasta I Durbudi lan ane luanan mawasta Ni Kacapa. Munggwing genah ipune irika ring telagane sane mauparengga sekancan sekar tur sami pade nede kembang, luir ipun sekar tunjung minakadi tunjung bang, tunjung putih, tunjung biru, lar sekar angasana, sekar jempiring kalih sane lian-lian. Telaga pinaka genah ipun i empas punika mawasta taman Kumuda Wati. Tiosan ring i empas irika taler wenten angsa akeh ipun kekalih luh muani, irika ipun melali-lali sarwi manjus. Sane lua mawasta Ni Cenkrenggi sane muani I Cengkrengga. Riantukan sampun sue pisan I angsa sareng I empas ring telagane punika, raris mekakalih ipun punika sampun rumaket pisan makekasihan lan makakantenan. Asapunika kauripan sadina-dina, ulung-tinulung, beriak-beriuk, salung-lung sabayantaka.

Kasuen-suen rauh reka masanin panes ngentak, ngantos toyan telaga Kumuda Watine punika tambis-tambis asat utawi luh. Duaning asapunika I angsa merasa kekewehan raris ipun lua muani mamanah jaga matinggal saking irika, matulak kagenahnyane riing. Duk punika semun nyane I angsa ngun nguns edih, santukan ipun irika anggen ring sawitrannyane I empas sane jagi tinggal ipun. Irika raris I angsa lue muani mesesambatang tur ngorahang kapining I empas makakalih. “Uduh cai nyai makarue, Deweke ngidih tekening cai nyai ajak dadua, melah-melah dini, wireh I dewek lakar ngalain anake buka cai nyai uli dini. Sawireh buka keto eda pesan cai nyai sebet, bane mabelasang ngajak I dewek uli jani, mani puan kewala enu pada idup, dumadak apang buin pada kacunduk. Nah, apang cai nyai tatas nawang apa awanan deweke ninggalin cai nyai? Wireh I dewek tusing pesan dadi pasha teken yehe. Pangungsin deweke jani lakar ka Gunung Imawan. Ditu ada  telaga melah madan Manasar, yehne ening pesan. Yan kapritiwimbayang telagane ento tan binakadi taman Narmadane, pesiraman Ida Bhatara Indra. Buine telagane ento yehne tusing taen asat apitui masan panes ngetak apa buin masan ujan jeg tetep kebek. Asapunika pajar I angsa, I empas luh muani merasa sedih pesan duaning jagi katinggal sawitra, solah ipun amelaskayun, matedoh ipun ring buntut angsane raris mapajar, sapuniki pajar ipun, Inggih Ratu, kalintang pisan tan swecan I Ratune ngwawulayang titiang kaliwat nista. Yan iratu nilar dewek titiang irika sapunapi dados titiange, tan pariwangde titiang pacang padem antuk sedih manah titiang tilar I Ratu. Yang ten iwang antuk titiang narka, I Ratu wantah ngardinin kenak pekayunang I Ratu kewanten, tan wenten nyaksi kesaktian lan kbayaparan titiang. Napi mawinan titiang matur sekadi punika, wireh titiang taler ngamertanyang toye tan bina ring I Ratu. Cendek ipun, titiang pacang ngiring I Ratu mangda titiang polih muponin kadarmaning sawitra”. Sapunika mungguwing aturne I empas. Sangkaning kapiwelasannyane I angse mirage baos ipun I empas, raris mebaos  I angsa. “Nah yan abuka keto, ne adan baan idewek naya upaya melah. Ne kayu atugel dangal, basatengaane, sabilang tanggu I dewek nanggal ajak dadua. Kewale ada pabesen kaine kapin cai, selantang-lantang jalan eda pesan cai nyai mamunyi japituwi ada anak matakon, ada anak nyacad utawi mariceda cai nyai, eda sautina. Ingetang pesan pabesen kaine, eda nyen cia linyok utawi ima teken pangarah deweke. Yan cai nyai ima, sing urungan cai nyai lakar ngemasin mat, mawastu tan prasida amun pengaptine”. Dening asapunika, lega pesan manahnya I empas pacang ngiring sapangarah angsane punika.

Gelisang satua, I empas sampun kekeberang olih I angsa ngalerang. Tambis rauh reke ring tegal wirajenggala, irika wenten asu kakalih  lua muani masayuban ring sor tarune. Sane muani mewasta I Angsang, sane lue Ni Angsing. Asapunika kebawos praya ngerereh teda, nanging lacur sue nenten polih punapa-punapi. Kabatek antuk layah kalih bedak ipun, raris nyongkok ipun sinambi manyonyoin pianak ipune, sane kantun malit.

Kala punika Ni Angsing makite nulengek ke ambarane, kakantenang wenten angsa ngerberang empas ngaja kanginang. Ni Angsing tengkejut lan kajagawok ngantenang. Sawireh sane sampun-sampun tan naenin ipun manggihin indik sekadi punika. Raris ipun mapiorahan ring muanin ipun : Ih Beli Angsa, tingalin ja baduur ada empas kakeberang baan angsa. Kija mirib lakar abane? “I Angsang masaur, “Sing ja buka munyin nyaine, dije ada perah empas kakeberang baan angsa. Kenengang awake ento tidong ja empas, tatwinyane tain sampi tuh, ane umahin bekutis. Ento keberange baan I Angsa. Wawu asapunika I empas mirage dewek ipun kakunggunh tain sampi tuh, kenginan metu brangtinyane tur gregetan raris bungut ipune enggang jagi nyander I Asu. Wireh bungut ipune enggang, dados ipun ulung ketanahe. Tan pawingde padem I empas makakalih. Disampune I empas padem kala irika lega pesan manah I Angsang kalih Ni Angsing maka miwah pianak-pianak ipune duaning mapikolih taledan becik marupa empas.

Risepadem I empas ne mangkin I angsa lua muani makakalih kalintang sedih tur masemu kangen mapan sawitrane tan pisan satia ring semaya mawastu ngemasin padem. Tumuli raris I angsa ngalanturang pakeberannyane angulayang ring ambarane ngalerang.